11-августта М. В. Фрунзенин мемориалдык үй-музейинде Кыргызстандын биринчи музейинин 100 жылдыгына арналган почта маркаларынын юбилейлик сериясына мөөр басуу салтанаттуу иш-чара өттү.

М. В. Фрунзенин мемориалдык үй-музейинин буюртмасы менен «Кыргыз почтасы» ААК тарабынан атайын юбилейлик почта маркаларынын сериясы чыгарылды. Бул чыгарылыш — жөн гана филателиялык серия эмес, музейдин жана доордун тарыхын чагылдырган өзгөчө көркөм эстелик.

Мындан 100 жыл мурун, Кыргызстандын жергесинде туулган көрүнүктүү мамлекеттик ишмер жана кол башчы Михаил Васильевич Фрунзенин элесин түбөлүккө калтыруу максатында, Кыргыз автономиялуу облусунун Советтеринин Борбордук аткаруу комитетинин Президиумунун 1925-жылдын 9-декабрындагы №77 протоколдук токтомунун негизинде мемориалдык музей негизделген.

Бир кылым аралыгында музей тарыхый доорлордун алмашуусуна күбө болуп, өлкөнүн саясий жана тарыхый мурасын сактаган маанилүү маданий жайлардын бири болуп келди.

Юбилейлик серия тогуз почта маркасынан турат. Алардын көркөм жасалгасында М. В. Фрунзенин өмүрүнүн ар кыл мезгилдериндеги портреттери, музейдин тарыхый имараты, доордун символдору жана Фрунзенин инсандыгынын Кыргызстандын тарыхы жана мамлекеттүүлүгүнүн калыптанышы менен байланышын чагылдырган образдар орун алган.

Салтанаттуу иш-чарада төмөнкү коноктор сөз сүйлөштү:

• К. М. Алмакучуков — М. В. Фрунзе мемориалдык үй-музейинин директору;

• Масиянова Уулжан — «Кыргыз почтасы» ААКнын башкы директорунун орун басары;

• Орозбекова Дамира — «Кыргыз почтасы» ААКнын Методология бөлүмүнүн башчысы.

Юбилейлик сериянын чыгарылышы — бул жөн гана филателиялык окуя эмес. Бул тарыхый эстутумду сактоонун жана Кыргызстандын тарыхындагы маанилүү барактарды маданият жана почта миниатюрасынын көркөм тили аркылуу кийинки муундарга жеткирүүнүн дагы бир жолу.

М. В. Фрунзенин Мемориалдык үй-музейинин 100 жылдыгына арналган юбилейлик почта маркаларын даярдоого жана чыгарууга көрсөткөн кызматташтыгы, колдоосу жана кесипкөйлүгү үчүн «Кыргыз почтасы» ААКсына терең ыраазычылык билдиребиз.