2026-жылдын 19-июнунда саат 11:00дө М.В. Фрунзенин мемориалдык үй-музейинде «Аял-жаратуучулардын образы: өткөн чак жана азыркы доор» аттуу көчмө көргөзмөсүнүн ачылышы болот.

Көргөзмөнүн максаты — көркөм жана документтик материалдар аркылуу көбүнчө байкалбай калган, бирок коом үчүн өтө чоң мааниге ээ болгон күчтүү жана эмгекчил аялдардын эмгегин көрсөтүү. Экспозиция ХХ кылымдагы кыргыз аялдарынын эмгек жолун заманбап эмгекчи аялдардын турмушу жана ишмердүүлүгү менен салыштырууга багытталган.

Көргөзмөдө өткөн кылымдын эмгекчил аялдарынын образдарын чагылдырган чыгармалар, ошондой эле айыл чарбасында, тигүү өндүрүшүндө жана соода тармагында эмгектенген аялдардын заманбап сүрөттөрү көрсөтүлөт. Талаалардан мөмө-жемиштерди жана жашылчаларды жыйнаган, тигүү цехтеринде иштеген жана базарларда соода кылган аялдардын образдары аркылуу алардын коомдогу ролу, жоопкерчилиги жана эмгекчилдиги ачылып берилет.

Экспозициянын маанилүү бөлүгүн Гапар Айтиев атындагы Кыргыз улуттук көркөм искусство музейинин фонддук коллекциясынан алынган чыгармалардын санариптештирилген көчүрмөлөрү түзөт. Алардын арасында Л.А. Ильинанын «Пахта жыйноочу» жана «Кызылчачы», К. Артыкбаевдин «Талаадагы аялдар», С. Акылбековдун «Кызылча талаасында», Л. Дейманттын «Саанчылар» графикалык эмгектери, ошондой эле аялдардын оор эмгегин чагылдырган О. Мануилованын чыгармалары бар. Экспозицияда графика, живопись жана скульптура чыгармалары орун алган.

Өткөн кылымдын чыгармалары менен заманбап сүрөт материалдарынын айкалышы аялдардын эмгегинин тарыхый сабакташтыгын көрсөтүп, аялдардын өлкөнүн социалдык-экономикалык өнүгүүсүнө кошкон олуттуу салымды баса белгилейт. Көрсөтүлгөн ар бир образынын артында күн сайын жан аябаган эмгеги менен өз үй-бүлөсүнүн жыргалчылыгын камсыз кылган жана коомдун өнүгүшүнө салым кошкон миңдеген аялдардын тагдыры турат.

Көргөзмө Борбор Азия Университетинин Маданий мурас жана гуманитардык илимдер бөлүмүнүн «Айкөл музей» долбоорунун алкагында уюштурулду.