Эл аралык ICOMдун демилгеси менен жыл сайын 18-майда белгиленүүчү Эл аралык музей күнүн утурлай, М. В. Фрунзенин мемориалдык үй-музейи борбор калаанын тургундарын жана конокторун 16-май күнү саат 14:00дөн 21:00гө чейин боло турган «Музейлер түнү» эл аралык акциясына катышууга чакырат.

2026-жылдагы акциянын темасы — «Бөлүнүп-жарылган дүйнөнү бириктирген музейлер». Бул ураан музейлердин диалог мейкиндиги катары өзгөчө ролун, тарыхый эстутумду жана маданий биримдикти сактоону баса белгилейт.

Акциянын алкагында келип түшүүчүлөрдү маданий-таанып билүүчүлүк бай программа күтөт. Музейдин коноктору М. В. Фрунзенин мемориалдык үй-музейинин туруктуу экспозициясына бара алышат, мастер-класстарга катышышат, тогуз коргоол улуттук акыл оюну менен таанышышат, ошондой эле «Эмирдин кылычы: доорлордун алмашуусунун символу» аттуу бир экспонаттын көргөзмөсүнө күбө болушат.

«Музейлер түнү» акциясы салт боюнча ар түрдүү муундагы адамдарды бириктирип, баарлашуу, чыгармачылык жана маданий мурас менен таанышуу үчүн мейкиндикти түзөт. М. В. Фрунзенин мемориалдык үй-музейи бардык каалоочуларды бул кечени тарыхтын, искусствонун жана жандуу маданий диалогдун атмосферасында өткөрүүгө чакырат.