Архитектура

Биринчи музей имараты 1879-жылы Михаил Фрунзенин атасы — фельдшер Василий Михайлович Фрунзе тарабынан курулган. Самандан согулуп, камыш менен чатырланган үй Васильевская жана Судейская көчөлөрүнүн кесилишинде (азыркы Раззаков жана Михаил Фрунзе көчөлөрү) жайгашкан. Үйгө улай жайкы ашканасы, кампасы жана үй ээси участкалык фельдшер болуп иштеген амбулаториясы бар флигель салынган.

1937-жылы биринчи масштабдуу реконструкция жүргүзүлүп, анын жүрүшүндө имарат кеңейтилип, өзгөртүлгөн. 1950-жылдары жаңы музей комплексин куруу жөнүндө чечим кабыл алынган. Бул үчүн эски курулуштар түрттүрүлгөн, бирок флигель сакталып калып, башкы мемориалдык объект катары жаңы имараттын ичине киргизилген.

Музейдин азыркы имараты советтик модернизм стилиндеги токтоо монументализмдин үлгүсү болуп саналат. Айнек менен капталган биринчи кабат имараттын ичинде жайгашкан мемориалдык флигелди сырттан көрүүгө мүмкүнчүлүк берет. Жогорку кабаттары ачык боз түстөгү бетон менен капталып, Октябрь революциясынын жана Граждандык согуштун окуяларына арналган барельефтер менен кооздолгон. Фасаддын борбордук көркөм акценти — Михаил Фрунзенин жезден чегилген профили. Реконструкциядан кийин музейдин экспозициялык аянты 2 миң чарчы метрге чейин кеңейтилген.